"Sabah" basketbol klubunun baş məşqçisi Lazar Spasiç "LANDAU Layons" üzərində qazanılan 84:74 hesablı qələbədən sonra matçla bağlı fikirlərini bölüşüb.
AzB.az xəbər verir ki, mütəxəssis komandasının xarakter nümayiş etdirdiyini və bu qalibiyyətin çox vacib olduğunu vurğulayıb:
"Bu oyunda qələbə bizim üçün vacib idi. Oyunçularımızın sona qədər mübarizə aparmasından, xarakter nümayiş etdirməsindən, komanda olaraq bir olmasından razı qaldım. Son 10 dəqiqədə oyunumuzu xüsusilə bəyəndim. Görüşün əvvəlində müəyyən həyəcan var idi. Hakimliyə gəlincə, onlar basketbolun inkişafında çox vacib rol oynayırlar. Mən onlardan gələcəkdə daha da inkişaf etmələrini və qarşıdakı böyük inkişaf prosesinin bir hissəsi olmalarını gözləyirəm. Təşkilatçılıq, ab-hava əla idi. Gördüklərimə əsasən düşünürəm ki, bizi rəqabətli liqa gözləyir.
Azarkeşlərimizə dəstəyə görə təşəkkür edirəm. Tribunada çoxlu insan görəndə xoşbəxt oluram. Ümid edirəm ki, azarkeşlərimiz bizi hər oyunda bu cür dəstəkləyəcəklər. Bizim işimiz oyunları qazanmaq və onlara sevinc bəxş etməkdir. Qarşıda bizi "Ritas"la çox çətin oyun gözləyir. Düşünürəm ki, son perioddakı kimi oynasaq, istənilən komandaya qarşı layiqli mübarizə apara bilərik".
